да аңғармаса керек. — Жәй, жәй ғой, әшейін,— деп күбір етті ол күйеуіне көз тастаудан қауіптеніп. Сөйтті де, өзінің от басында отырғанын енді ғана байқаған кісіше орнынан ұшып тұрып, үйге кіріп кетті. Ол кешкі тамақтың қамына кіріскісі келді. Бірақ, не дайындау керек, неден бастау керек, ыдыс-аяқтар қайда, бәрін де күндегідей бірден алып кете алмай, әр затты ойлана, күдіктене ұстады. Ермекбай әйелінің бүгінгі мінезіне таңданумен болды. Бір жерің ауырып жүрген жоқ па деп қайта-қайта сұрады. Мұның бәріне де ол «жоқ» деген қысқа ғана жауап алды. Қандай іске кіріспесін, Кәмшәттің есінен әлгі хат бір сәтке де кетпеді. «Ғашық болған адам» деген сөз есіне түскен сайын буындары қалтырап, еріндері күбірлеумен болды. Бір мезгіл шелектегі суды қазанға құяйын деп оның бауынан ұстай бергенде, тұп-тұнық мөлдір судың ар жағынан өзіне ұшқын шашып, тесіле қарап тұрған Бектемірдің отты жанарын көрді. Ток ұрғандай оның тұла бойы ду етіп, шелектегі суды қара қазанға ақтара салды. Ол хатты онан әрі оқи алмайтынына көзі жетті. Сонан соң оны ертеңге дейін бір жерге жасыра тұруды ойлады. Әйтсе де, бір жапырақ қағазды көзден таса қылатын бірде-бір қолайлы орын таппады. Үйге кіріп, төрдегі сандыққа салып қойғысы келді. Бірақ, кешке қарай Ермекбай әлдене іздей қалса көріп қояр деп қорықты. Жүктің арасына жасырсам ба екен деді. Жамылуға көрпе алғанда, одан да көзге түсіп қалар деп шошынды. Сонан соң оны радионың артына қойды. Енді ешкім оның астын қарай қоймас деген сеніммен сәл кейін шегінді. Сөйтсе де, сол мезетте-ақ хатты ол жерден суырып алды. Неге екені белгісіз бұл орын да тіпті қолайсыз сияқты болып көрінді. Одан кейін ауызғы үйдегі шелектің астына қойды. Шелек көтерілгенде, көрініп калар деп, ол жерге де тұрақтамады. Қағазды оның жасырмаған жері қалмады. Сонда да өзіне-өзі сенбей, қойған жерінен қайтып алып, басқа орынға ауыстырумен болды. Ермекбай жайғасып әлдеқалай бір қағаздарына шұқшиып отырған кезінде Кәмшәт құрал-сайман сақтайтын кішкене сарайға кірді. Сол бойда кеудешесінің қалтасындағы хатты суырып алып, бұрыштағы тышқан қазып тастаған інге қағазды шиыршықтап тықты да, үстін дымқыл топырақпен көмді. Сонан соң Ермекбай трактор айдап жүрген кезде оны-мұны темірлерін салып жүретін май сіңген зілдей қара дорбаны оның үстіне әкеп тастай салды. Ол кеудесін көтеріп мандайынан шып-шып шыққан терді жеңімен бір сүртіп, терең күрсінді. * * * Кәмшәт түні бойы ұйқтай алмады. Ертеңіне жұмысқа барғанда да мандытып істеген жоқ. Мұны кейбіреулер жас келіншектің тұңғыш көтерген баланы ауырсынып жүргені болар деп жорамалдаса, енді біреулері «байы бригадир болған соң керенау тартып жүргені шығар» деп тұспалдады. Ал Кәмшәт жұрттың бірде-біріне назар аударған жоқ. Күнде кім қанша істеді, жұмысқа кім
Pages: 1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66