— Осылай шығар деп ойлап ем-ау бәсе. Демек, менің Ермекбай туралы айтқаным да дұрыс екен ғой. Бұл жолы Кәмшәт тіл қатпады. «Иә» демеді де, «жоқ» демеді де. Сені осыдан сақтандырғым келеді сіңілім. Алғаш араласа бастағанымызда Ермекбай саған дегенде елжіреп-ақ тұратын. Мен қайдан білейін, қазір тіпті басқаша сияқты. Өзгерген-ау сірә. Адам мінезі бір өзгерсе, бұрынғы қалпына қайта келуі қиын. Кайта қалпына келтіремін деген әрекетің құмға құйған судай жоғала береді де, бұрынғы қадірің уыстағы сусып түскен тарыдай таусыла береді. Оған күннен күнге жек көрінішті боласың. Оның саған қарағысы да, сөйлегісі де келмейтін болады. Сол кезде өмірдің қандай сәні, қандай мәні қалмақ? Міне, мен дәл осындай сүреңсіз жағдайды басымнан кешірдім. Алғашқы кезде ол да елжіреп, жүрегін қолына алып тұратын. Бертін келе онын бәрі де пышақпен кескендей таппа тиылды. Маған қарап сөйлемейтінді шығарды. Ал мен үй қызыметіндегі әйел тәрізді боп қала бердім. Сүйте-сүйте ішіп келіп ұратын да болды. Ақыры сол ішкіліктің салдарынан арақ бермей қойған күзетшіні сабаймын деп сотталып кетті. Бес жылға сотталды. Мен күтпедім. Несіне күтем? Оның қайтып келіп тағы да сабауын күтемін бе? Кетіп қалдым. Оның мұндай болатынын бұрын білсем ғой… Нем бар басымды азапқа байлап. Сол баяғы өзімді өлердей сүйген дәрігер жігітпен қол ұстасып кетер едім-ау! Мен сөз жоқ бақытты әйел болар ем. Онымен бақытты болатынымды алғашқы жалт еткен көзқарасынан-ақ байқап едім. Көп жыл өтіп кеткен соң құр күрсініп күңіренумен не бітеді? Өз жолымды өзім байладым ғой мен… — Ол сізді шынымен ұрушы ма еді? — Саған өтірік айтып қайтейін. Оның сабайтынына мақтанып отыр ғой деймісің. Мұның үстіне ол басқа бір жезөкшемен қыдыратын еді. Маған көңіл аудармайтын себебі сол болса керек. Кәмшәттің мынадай сұмдықтан жаны шошыды. Мұз астынан шыққан адамдай тұла бойы қалтырап кетті. Өмірде мұндай әділетсіздік болады деп ол ешқашан ойламаған еді. Сонымен бірге оның көз алдынан арық қолдарын маңдайына тіреп, жанына түскен жазылмас жараның азабынан құтылар жол таппай қимылсыз отырған әлгі қурайдай жігіт кетпей қойды. — Сіз күйеуіңіздің басқа біреумен көңіл қосқанын білдіңіз бе? — Баласың-ау сіңілім. Еркектер құпиясын білдіре қоя ма? Біз сияқты олар аңқау емес қой. Сүйдім-күйдім деп келеді де, бір күні бояуды сенен гөрі қалыңырақ жаққан біреумен қолтықтасып кете барады. Әйел байғұс зар еңіреп қала береді. Құр сүлдерің ғана қалады. Бір заманда құлай сүйген адамың кеудеңдегі жаныңды қамырдан қыл суырғандай білдірмей алып кетіп бара жатады. Сол сияқты мен де дәнеңе сезген жоқпын. — Сұмдық екен бұл… — Сұмдық болғанда несін айтасың. Сен де менің басқан ізіммен жүріп қалма. Кейін бармағыңды тістейсің. Әйтеуір, мен Ермекбайдан күдіктенемін. Байқа
Pages: 1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66