жақсы көре ме? Жо-жоқ, ол мүмкін емес!.. *** Жас келіншек Бектемірге хатты қалай берудің ретін қарастырумен болды. Почта арқылы жібермек болды. Бірақ басқа біреудің қолына түсіп қалар деп қорықты. Өзге біреулерден беріп жіберуге тағы шошынды. Өзіне беруге… Кәмшәт үшін бұл өліммен бірдей. Ақырында оның ойлап тапқаны — Әсилә болды. Оған «ешкімге айта көрмеңіз» деп өлердегі сөзін айтып, хатты беріп жіберуге бекінді. Бір күні түс кезінде, мақташылар жарым сағат тамақ ішуге отырғанда Кәмшәт суы тартылған кісі бойы келетін арыққа түсіп, алыстан көрініп тұрған қос терекке қарай бет бұрды. Ол жұмыс басынан ұзағанша төбем көрініп қалар деп бұқпалап жүріп отырды. Арық іші салқын екен. Біраздан соң кеудешесінің қалтасындағы хатты тағы бір қарап қойды да, мойнын созып арық сыртынан ауыл жаққа көз тікті. Қос теректің түбіне таянып қапты. Енді мына аралықтағы алаңқайдан өтсе, ары қарай тал арасына кіріп, көзге түспеуіне болады. Ол осы жерде отырып біраз дем алды. Сүмбіленің қытымыр ащы күні күйдіріп барады. Бірін-бірі жетектеп шұбатылған күзгі мизамдар жер бетін қалқи ұшып, құмаймен кекірелердің басына қонақтап жатыр. Тізіле өскен теректердің арасынан бір кезде Әсиләнің тұлғасын көріп қалғандай болды. Ол мойнын соза түсіп анықтап қарағанда, дүкен жаққа бет алып бара жатқан Әсиләні тани кетті. Есік алдында машина көрінбейді. Бектемір жоқ болғаны. Кәмшәт үйге таянды. Ішке кіріп-шығып жүрген кемпірмен жәй ғана амандасты да, «Әсилә жоқ па?» деп сұрады оның жоқ екенін біле тұрса да. «Қазір келеді, үйге кіріп күте тұр» деп бәйек болған кемпірдің сөзіне ол сыпайылықпен қарсылық көрсетіп, ол келгенше көлеңкеде отыра тұратынын айтты. Кемпір оның алдына жайпақ табаққа салып жүзім әкеп қойды. Кәмшәт Әсиләні көп күтті. Кемпір әрнәрсе туралы бір сөйлеп, сөзі жараспаған соң буыны сытырлай көтеріліп көрші үйге кетіп қалды. Ширек сағат өткенде қақпа сыртынан Әсиләнің сықылықтай күлгені естілді. «Ал сау бол, Бекеңе сәлем айт» деген Ермекбайдың даусы шықты. Кәмшәттің қолынан жүзімі түсіп кетті. Дәл қазір күйеуі кіріп келіп, қолындағы хатын жұлып алатындай көрінді. Ол ағаш тасасына тығыла түсті. Осы кезде қақпа есігі сарт етіп жабылды да, қолында қағазға оралған заттары бар Әсилә кіріп келді. Олар көптен көріспеген апалы-сіңлілерше шүйіркелесе табысты. Екеуі көлеңке астында отырып шай ішті. Шай ішіліп болған соң Әсилә Кәмшәтті өз бөлмесіне алып кірді де, қандай өзгерістер барын сұрады. Кәмшәт сұрақтың бәріне де селсоқ жауап беріп отырды. Оның ойында «хатты қалай беру керек» деген жалғыз түйіткіл тұрды. Ақырында ол есік-терезеге бір қарап алды да: — Апай,— деді қалтыраған үнмен. — Не сіңілім? — Сіз… сіз мені жақсы көресіз бе? — Әлбетте сіңілім, әлбетте. Бұ қай сұрағың. — Мен
Pages: 1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66