ме? — Кәмшәт кекесін түрде сұрады. — Енді… Дәл сондай көк болмаса сарысын алармыз, қызылын алармыз… Әйтеуір машина ғой. Кәмшәт ызаға булығып дірілдеп кетті. Күйеуінің ішіп отырған тамағын лақтырып жіберіп: «жігерсіз, намыссыз» деп шапалақпен салып-салып жібергісі келді. Бірақ, онысымен ешнәрсе өндіре алмайтынын, әзір ашуланғанмен ертесіне оның дәл осылайша тамағын ішіп бейғам отыра беретінін, Бектемірді «Бекең» деуін өз әйелін тартып алып кетсе де қоймайтынын Кәмшәт анық білді. Сондықтан ол күйеуіне айтатын, жанына бататын сөз таба алмады. Орамалымен бетін басып, далаға жүгіре шықты. Күздің қорғасындай қою бұлты аспаңды қаптап алыпты. Шапырлаған жұлдыздардың бірі де көрінбейді. Оңтүстіктен соққан қатты жел екілене түсіп көйлекті жұлқылайды. Тамға салынған ескі қамыстар жанды тырналап желмен бірге мазасыз ызыңдайды. Кәмшәт ауылдан ұзай берді. Біраздан соң бұрылып артына қарағанда өз үйінің белгісін де таба алмады. Көз ұшында қараңғылық арасынан қарауытып Қос терек қана көрінеді. «Қош!» — деді Кәмшәт күбірлеп. Сонан соң алған бағытына қарай жүрісін жылдамдата түсті. * * * Кәмшәт басын көтеріп, су болған жастығының екінші жағын аударып қойды. Қайтып жатпады. Таң атып қапты. Есік алдынан сиыр айдап бара жатқан адамдардың саңқ-саңқ еткен дауыстары естіледі. Үй ішіндегілер де ұйқыларынан оянып, тұра бастады. Өгей шешесінің: «Ай, тұр бол, үй әктейміз» деген даусы да естілді. Ертең күйеудегі Мағирашы келмек. Ол өзінен аттай жиырма жас үлкен бір мал дәрігерге тиген. Кәмшәт ауыр күрсініп, терін сүртті. Салқын ауаға шығып, кеудесін кере дем алды. Жерге аппақ боп қырау түсіп қапты. Ол ауылдан ұзап, арық жағасына кеп отырды. Мөлдір де мұздай сумен бетін жуды. Сол қезде оң жақ бүйірі тағы да бүлк-бүлк ете түсті. Өткендегісінен тегеурінді де күштірек. Жас әйелдің жүрегі жел үрлеген жапырақтай лүп етіп, ұйысқан қайғысы мен мұңын бір сәтке серпіп тастағандай болды. Қаратаудың ар жағынан күн де иек артып келе жатыр.    

Pages: 1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66